مشرق بعید کے ملک ملائیشیا میں غیر قانونی تارکین کو ملازمت اور رہائش فراہم کرنے پر دو شہریوں کو جرمانوں کی سزا سنا دی گئی ہے۔ 42 سالہ مرد شاؤ پر چار غیر قانونی تارکین کو ملازمت دینے کا  الزام ثابت ہوا جن میں فلپائن کے تین اور انڈونیشیا کا  ایک باشندہ شامل ہے۔ عدالت نے اسے ہر غیرقانونی شخص کے بدلے دس ہزار رنگٹ کا جرمانہ کیا۔ شاؤ کو 40 ہزار رنگٹ جرمانہ ادا نہ کرنے کی صورت میں دو ماہ جیل میں گزارنے ہوں گے۔ اس نے عدالت سے درخواست کی کہ اسے جرمانہ چار اقساط میں جمع کروانے کی اجازت دی جائے جسے قبول کر لیا گیا۔

دوسری جانب لوونتھ نامی خاتون کو ان چار غیر قانونی تارکین کو  کرائے پر رہائش فراہم کرنے کے جرم میں 20 ہزار رنگٹ جرمانہ کر دیا گیا۔ اس نے بغیر کسی قانونی دستاویز کے ان تارکین کو اپنے گھر میں رہنے کی اجازت دی تھی۔ ملائیشیا کے قانون کے مطابق غیر قانونی تارکین کو سہولت فراہم کرنے پر دس ہزار سے پچاس ہزار رنگٹ جرمانہ، ایک سال تک قید کی سزا یا دونوں سزائیں اکٹھی بھی ہو سکتی ہیں۔