ہالینڈ کی  حکومت نے ملک بھر میں پانچ سے گیارہ سال کے بچوں کی کورونا ویکسی نیشن جنوری میں شروع کرنے کااعلان کیا ہے۔ پبلک ہیلتھ انسٹی ٹیوٹ کا کہنا ہےکہ والدین بچوں کی رجسٹریشن 18 جنوری سے کروا سکیں گے جبکہ انہیں 25 جنوری سے ویکسی نیشن لگانا شروع کر دی جائے گی۔

اعدادوشمار کے مطابق ہالینڈ میں اس وقت پانچ سے گیارہ سال تک کے تیرہ لاکھ بچے ہیں جنہیں اس مہم میں ویکسی نیشن دی جائے گی۔ حکام کے مطابق ان بچوں کو بالغوں کو دی جانے والی ویکسی نیشن کا تیسرا حصہ لگایا جائے گا۔ نیشنل ہیلتھ کونسل کا کہنا ہے کہ بچوں کی ویکسی نیشن سے سکولوں اور سپورٹس کلبوں میں کورونا روکنے میں مدد ملے گی جس سے پابندیوں میں نرمی کرنے کی راہ ہموار ہو سکے گی۔ بچوں کو ویکسی نیشن لگانے کا فیصلہ کابینہ نے نیشنل ہیلتھ کونسل کی سفارش پر گزشتہ ماہ کیا تھا۔