ہالینڈ میں پولیس نے ایک ایسے شخص کو گرفتار کر لیا ہے جو جہاز کے لینڈنگ گیئر یعنی پہیے میں چھپ کر ملک میں داخل ہوا۔ پولیس کا کہنا ہے کہ ملزم جنوبی افریقہ سے دارالحکومت ایمسٹرڈیم کے انٹرنیشنل ائیر پورٹ پہنچا تھا۔ جس جہاز کے پہیے میں چھپ کر وہ ہالینڈ پہنچا وہ ایک کارگو جہازتھا جو سامان جنوبی افریقہ چھوڑ کر ہالینڈ واپس پہنچا تھا۔ ملزم جوہانسبرگ ائیر پورٹ پر چھپ چھپا کر جہاز کے لینڈنگ گئیر تک پہنچا اور پھر اس میں چھپ گیا۔

حکام کا کہنا ہے کہ ملزم گیارہ گھنٹے کی فلائٹ کے دوران چھپ کر بیٹھا رہا جہاں اسے تیس ہزار سےزائد فٹ کی بلندی پر آکسیجن کی کمی اور شدید سردی کا سامنا بھی کرنا پڑا۔ ان کا کہنا ہے کہ اس کا زندہ رہنا کسی معجزے سے کم نہیں۔ اسے گرفتار کر کے فوری طور پر ہسپتال منتقل کیا گیا جہاں اس کی حالت خطرے سے باہر بیان کی جارہی ہے۔ جہاز کے پہیے میں چھپ کر یورپی ممالک پہنچنے کی کوشش میں کئی افراد زندگی کی بازی ہار چکے ہیں۔ حال ہی میں افغانستان کے کابل ائیر پورٹ پر جہاز کے لینڈنگ گیئر میں چھپنے والے دو افغان باشندے زمین پر گر کر جاں بحق ہو گئے تھے۔