افریقہ سے غیر قانونی طریقے سے یورپ داخل ہونے کی کوشش کرنے والے تین سو سے زائد تارکین کو کھلے سمندر میں ڈوبنے سے بچا لیاگیا۔ تارکین مختلف کشتیوں میں سوار ہو کر سپین کے کینری آئی لینڈ کے ذریعے یورپ میں داخل ہونے کے خواہشمند تھے۔ سپین کی سمندر میں ریسکیو آپریشن کرنے والی سروس نے انہیں بچا کر زمین پر منتقل کیا۔ ایک این جی او کے مطابق تارکین میں سے اٹھارہ ڈوب کر مارے بھی گئے لیکن سروس نے اس کی تصدیق  نہیں کی۔

 ریسکیو سرورس کی جانب سے جاری ہونے والے بیان میں بتایا گیا ہے کہ اس نے 6 کشتیوں میں سوار مجموعی طور پر 319 تارکین کو حراست میں لیا۔ ایک کشتی اتنی بڑی تھی کہ اس پر 120 افراد بھی سوار تھے۔ایک حاملہ خاتون اور شیر خوار بچے سمیت دس افراد کو خراب صحت پر ہسپتال منتقل کر دیا گیا۔ سپین کا ساحلی علاقہ مغربی افریقہ سے آنے والے غیر قانونی تارکین کا مستقل راستہ بن چکا ہے۔ گزشتہ سال اس راستے سے 22ہزار 316 غیر قانونی تارکین سپین میں داخل ہوئے تھے۔ اس کوشش میں 4 ہزار 400 سے زائد تارکین ڈوب کر ہلاک ہوئے جن میں کم سے کم 205 بچے بھی شامل تھے۔