امریکی امیگریشن آفیسرز کی تحقیقات میں سرحدوں پر تعینات بارڈر پٹرول آفیسرز کی جانب سے پناہ گزینوں کے ساتھ انتہائی انسانیت سوز سلوک کا انکشاف ہواہے۔ ہیومن رائٹس واچ کی جانب سے اکٹھی کی گئی 160 سرکاری رپورٹوں میں امریکی پناہ کے متلاشی غیر ملکیوں کے ساتھ غیر انسانی سلوک روا رکھا جانا سامنے آیا ہے۔ ایک رپورٹ کے مطابق جب ہنڈوراس کے ایک پناہ گزین نے واپس بھیجے جانے والی دستاویز پر دستخط کرنے سے انکار کیا تو  امریکی آفیسر نے اسے دھمکی دی کہ اسے جیل میں ڈال دیا جائے گا جہاں اس کے ساتھ جنسی زیادتی کی جائے گی۔

ایک خاتون پناہ گزین نے بتایا کہ جب اس نے بھاگنے کی کوشش کی تو آفیسر نے اسے پکڑ کر زمین پر گرا دیا اور اسے بار بار زمین پر پٹخنے کے علاوہ اس کی پسلیوں میں ٹھڈے مارتا رہا جس پر اس کا خون نکلنا شروع ہو گیا۔ یہ رپورٹ سن 2016 سے 2021 کے دوران پیش آنے والے واقعات میں سے چند واقعات کی تحقیقات پر مبنی ہیں۔ صدر جو بائیڈن نے ایسے افسروں کو سزا دینے کے ساتھ ساتھ تحقیقات کو عام کرنے کا وعدہ بھی کیا ہے۔