کشتی کے ذریعے ترکی سے یونان میں داخل ہونے کی کوشش میں چار افراد سمندر میں ڈوب گئے۔ ڈوبنے والوں میں تین بچے بھی شامل ہیں۔ یونانی کوسٹ گارڈز کے مطابق کشتی پر مجموعی طور پر 23 افراد سوار تھے جو یونان کے ساحل کے قریب گہرے سمندر میں ڈوب گئی۔ باقی تمام افراد کو بچا لیا گیا۔ بچائے جانے والے مسافروں نے بتایا کہ موسم خراب ہونے کی وجہ سے ان کی کشتی سمندر میں ڈوبی جس پر گنجائش سے زیادہ افراد سوار تھے۔ ریسکیو آپریشن میں دس کشتیوں اور دو ہیلی کاپٹروں نے حصہ لیا۔

حکام نے اس کا الزام انسانی سمگلنگ میں ملوث افراد کو دیتے ہوئے کہا ہے کہ ایجنٹ انہیں سہانے خواب دکھا کر کشتی میں سوار کروا کر خود غائب ہو جاتے ہیں۔ اقوام متحدہ کے ادارہ برائے پناہ گزیں کے مطابق اس سال ترکی کی زمینی سرحد سے ساڑھے چھ ہزار سے زائد مہاجرین یونان میں داخل ہو چکے ہیں۔