سپین کے جزیرے کینری آئی لینڈ کے قریب بحرالکاہل میں تارکین کی ایک کشتی پر سوار افراد کو بچاتے ہوئے ایک بچہ جان کی بازی ہار گیا۔ سپینش حکام کے مطابق ساحل سے 185 کلو میٹر دور سمندر میں ایک بھٹکی ہوئی کشتی دیکھی گئی۔ ہیلی کاپٹر کے ذریعے اس پر سوار افراد کو بچانے کی کوشش کی گئی جن میں دو بالغ اور چھ بچے سوار تھے۔ تمام افراد کو ہسپتال منتقل کر دیا گیا تاہم ایک بچہ رستے میں ہی دم توڑ گیا۔

ہسپتال میں داخل کرائے جانے والے افراد پانی کی شدید کمی کا شکار تھے۔ ریڈ کراس کے ایک اہلکار کے مطابق ہسپتال پہنچائے جانے والے افراد آٹھ دن پہلے مغربی صحارا سے کشتی پر روانہ ہوئے تھے اور یورپ منتقل ہونا چاہتے تھے۔ ہر سال ہزاروں افراد کشتیوں پر سوار ہو کر افریقہ سے یورپ پہنچنے کی کوشش کرتے ہیں اور اس دوران کئی افراد جان سے ہاتھ دھو بیٹھتے ہیں۔یورپی ممالک کی جانب سے زمینی راستوں پر سیکیورٹی کے سخت انتظامات کے بعد سمندر سے آنے والوں کی تعداد میں مسلسل اضافہ بھی دیکھنے میں آ رہا ہے۔