کورونا وائرس کا شکارہونے کی وجہ سے کینیڈا کے تمام صوبوں میں سرکاری ملازمین کی بڑی تعداد آئیسولیشن اختیار کرنے پر مجبور ہے۔ سٹاف کی کمی کی وجہ سے ہسپتالوں اور پولیس سمیت تمام عوامی خدمات کے سرکاری اداروں کو شدید مشکلات کا سامنا ہے۔ ہسپتالوں اور پولیس کی ایمرجنسی خدمات میں خلل پڑنے سے بڑے نقصان کا خدشہ بھی منڈلا رہا ہے۔ گزشتہ ہفتے کینیڈا کے سب سے بڑے شہر ٹورنٹو میں ایک وقت ایسا بھی آیا جب ایمرجنسی کال کی صورت میں کوئی ایمبولینس دستیاب نہیں تھی۔

ٹورنٹو کی سٹی انتظامیہ کا کہنا ہے کہ اس کے ملازمین میں سے 12.8 فیصد کورونا کا شکار ہو کر چھٹی پر ہیں۔ صرف پیرامیڈیکل سٹاف میں سے ہی 1400 ملازمین کورونا کا شکار ہو کر گھروں پر قرنطینہ اختیار کئے ہوئے ہیں۔ اونٹاریو کی علاقائی ٹرانزٹ آپریٹر میٹرو لینکس کا 20 سے 30 فیصد سٹاف کورونا کا شکار ہونے پر اس کی سروسز 15 فیصد تک محدود کر دی گئی ہیں۔ا دھر بحر اوقیانوس  کے شہر ہیلی فیکس میں کورونا کا شکار ملازموں کی کمی کے باعث بس اور فیری سروس معطل رہی۔