جنوبی کوریا نے ملک میں کام کرنے والے غیر ملکی ورکرز کی چھٹی کے بعد ملک میں واپسی کی مہلت کم کر کے ایک ماہ کر دی ہے۔ اس سے پہلے غیر ملکی ورکرز تین ماہ تک ملک سے باہر رہ سکتے تھے۔ وزارت روزگار و محنت کا کہنا ہے یہ فیصلہ چھوٹے مینو فیکچرنگ یونٹس، زراعت، ماہی گیری اور ڈیری جیسی مصنوعات میں کام کے تسلسل کو بہتر بنانے کے لیے کیا گیا ہے۔ یہ تبدیلی جس آرڈیننس کے تحت عمل میں لائی گئی ہے اس کی منظوری جنوبی کوریا کی قومی اسمبلی نے رواں سال مارچ میں دی تھی۔

اس وقت قانون کے مطابق غیر ملکی 4 سال 10 ماہ تک جنوبی کوریا میں کام کر سکتے ہیں۔ اگر کوئی غیر ملکی ورکر ایک ہی جگہ 4 سال 10 مہینے کام کریں تو انہیں مزید اتنی ہی مدت کے لیے کام کرنے کا موقع دیا جاتا ہے لیکن اس کے لیے ضروری ہوتا ہے کہ وہ تین ماہ کے لیے ملک سے باہر رہیں۔ اس قانون کے خلاف شکایات سامنے آئی تھیں کہ 3 ماہ ورکرز کے باہر رہنے سے کام کے تسلسل پر منفی اثرات مرتب ہوتے ہیں اس لیے اسے کم کر کے ایک ماہ کر دیا گیا ہے۔