پولینڈ نے سنٹرل یورپ کے ممالک میں داخل ہونے کے خواہشمند غیر قانونی تارکین وطن کا رستہ روکنے کے لیے بڑی دیوار تعمیر کرنے کے منصوبے کا اعلان کیا ہے۔ منصوبے کے تحت یہ دیوار ہمسایہ ملک بیلاروس کی سرحد پر تعمیر کی جائے گی اور اس پر 40 کروڑ40 لاکھ ڈالر یعنی تقریباً 70 ارب پاکستانی روپے خرچ کئے جائیں گے۔ دیوار بنانے کا بل پولینڈ کی پارلیمنٹ میں پیش کر دیا گیا ہے جس پر بحث کے بعد اسے منظور کیا جائے گا۔

یہ منصوبہ جرمنی کے اس اعلان کے بعد سامنے آیا ہے جس میں کہا گیا تھا کہ پولینڈ سے جرمنی میں داخل ہونے والے تارکین کی تعداد میں بڑا اضافہ دیکھا جا رہا ہے۔ پولینڈ نے اگست میں بیلاروس کے ساتھ سرحد پر باڑ لگانے کا کام شروع کیا تھا جس پر اسے تنقید کا سامنا بھی کرنا پڑا تھا کہ اس کے بارڈر اہلکاروں کا رویہ تارکین کے ساتھ غیر انسانی رہا ہے۔ گزشتہ دو ماہ کے دوران پولینڈ کے بارڈر گارڈز نے بیلاروس سے ملک میں داخل ہونے کی آٹھ ہزار کے قریب کوششوں کو ناکام بنایا ہے۔