پاکستان سے باہر جانے والے مسافروں کے لیے ائیر پورٹس پر کورونا وائرس کے خلاف بوسٹر شاٹ فری کرنے کا اعلان کر دیا گیا ہے۔ بوسٹر شاٹ ایسے افراد کو لگایا جاتا ہے جنہوں نے کورونا کے خلاف دستیاب کسی بھی ویکسین کی مکمل خوراکیں لگوا لی ہوں۔ پاکستان کی وفاقی وزارت صحت نے 27 اگست 2021 کو نوٹی فیکیشن جاری کیا تھا کہ پاکستانی ائیر پورٹس پر قائم بوسٹر ڈوز سے شاٹ لگوانے والے ہر مسافر سے ایک ہزار 270 روپے وصول کئے جائیں گے۔  بوسٹر شاٹ  کی رقم وصول کرنے پر  مسافروں کی جانب سے احتجاج کیا گیا تھا۔ ان کا کہنا تھا کہ ملک بھر میں کورونا ویکسین کے ساتھ ساتھ بوسٹر شاٹ بھی فری ہے تو پھر ائیر پورٹس پر رقم بٹورنے کا سلسلہ بند کیا جائے۔ وفاقی وزارت صحت نے آج ایک نیا نوٹی فی کیشن جاری کیا ہے جس کے تحت 27 اگست کا علامیہ واپس لے لیا گیا ہے ۔ آج سے تمام ائیر پورٹس پر کورونا بوسٹر بغیر معاوضے کے لگنے شروع ہو گئے ہیں۔