کینیڈا کے کھانے اور رہائش کے سیکٹر میں کام کرنے والے تقریباً ایک چوتھائی ملین ورکرز نے اس سیکٹر سے کنارہ کشی اختیار کر لی ہے۔ سرکاری ادارے کی تحقیق کے مطابق اتنے بڑے پیمانے پر سیکٹر چھوڑنے کی وجوہات میں کم تنخواہیں اور کورونا جیسے عوامل نمایاں ہیں۔ سیکٹر سے رخصت ہونے والے افراد نے زیادہ تر اکاؤنٹنٹس، وکلا اور نقشہ نویسوں وغیرہ کے سیکرٹریز یا اسسٹنٹس کی نوکریاں اختیار کر لی ہیں۔

کینیڈا کے لیبر فورس سروے کے مطابق فوڈ سروسز میں نوکریوں کی تعدادکورونا شروع ہونے سے پہلے کے مقابلے میں 14.8 فیصد کم ہو گئی ہے۔ ماہرین کا کہنا ہے کورونا ایس او پیز لاگو ہونے کے بعد ریستورانوں کی نوکری مشکل تر ہو گئی ہے کیونکہ اب آپ کو سارا دن خود ماسک پہنے رکھنا پڑتا ہے، گاہکوں کو ماسک اور ویکسی نیشن پوچھنے پر ان کے غصے کا سامنا کرنا پڑتا ہے، ساتھ آپ کو کورونا لاحق ہونے کا خطرہ بھی آپ کے سر پر منڈلاتا رہتا ہے جبکہ آپ کو یہ بھی علم نہیں ہوتا کہ کس وقت آپ کا سیکٹر ہی بند کر دیا جائے۔ ان حالات میں لوگوں کا ریستوران سیکٹر چھوڑ کر وائٹ کالر نوکریاں تلاش کرنا فطری عمل ہے جن میں نہ تو اتنے خطرات ہیں اور نہ ہی تنخواہیں اتنی کم ہیں۔