ہالینڈ کی معیشت کورونا کے مہلک وار سے نکل کر بہتری کی جانب گامزن ہو گئی ہے۔

اس امر کا اظہار ہالینڈ کے قومی ادارہ شماریات کی جانب سے جاری کئے گئے تازہ ترین اعداد و شمار میں بھی سامنے آیا ہے۔ ان اعدادو شمار کے مطابق ہالینڈ میں گزشتہ تین ماہ کے دوران ہر ماہ 22 ہزار نئی نوکریاں پیدا ہوئی ہیں جس سے ملک میں بر سر روزگار افراد کی تعداد 91 لاکھ ہو گئی ہے۔ نوکریوں میں اس قدر اضافے نے بے روزگاری کی شرح کو 3.1 فیصد تک کم کر دیا ہے جو کورونا وبا کے دوران 4.6 فیصد کی انتہائی بلند سطح پر پہنچ گئی تھی۔

اس کے ساتھ ہی بے روزگاری کے سرکاری فوائد لینے والوں کی تعداد بھی 2.2 فیصد کمی سے2 لاکھ 7 ہزار 900 رہ گئی ہے۔ سب سے زیادہ کمی ہوٹلوں اور ریسٹورنٹس کی صنعت میں ہوئی جہاں یہ 12.3 فیصد ریکارڈ کی گئی۔ ہالینڈ میں پابندیوں کے نرمی کے بعد گزشتہ مہینے  خدمات کے شعبے میں لوگوں نے 10 فیصد زیادہ رقم خرچ کی۔