سعودی حکومت نے عمرہ زائرین کے لیے 14 روزہ انتظار کی شرط ختم کردی ہے۔ سعودی وزارت حج و عمرہ کی جانب سے بتایا گیا ہے کہ عمرہ کرنے کے خواہشمند مسلمانوں کو اب 14 روز انتظار نہیں کرنا پڑے گا کیونکہ کورونا کی صورتحال پہلے سے بہت بہتر ہو گئی ہے۔ حکام کا کہنا ہے کہ حفاظتی اقدامات میں کمی کے بعد مسجد الحرام میں آپریشنل صلاحیت بہت زیادہ بڑھ گئی ہے جس سے عمرہ اور نماز ادا کرنے والوں کی بڑی تعداد کا آنا ممکن ہو گیا ہے۔ طویل مدت تک بندشوں کے بعد عمرہ کرنےکے خواہشمند افراد کی تعداد بہت زیادہ بڑھ چکی ہے، امید کی جا رہی ہے کہ چند مہینوں میں لاکھوں مسلمان عمرہ ادا کر لیں گے۔ سعودی حکومت نے 16 اکتوبر کو سلطنت میں کورونا سے متعلق پابندیوں میں بڑے پیمانے پر نرمی کر دی تھی۔ان پابندیوں کا اطلاق مکہ مکرمہ میں حرم شریف اور مدینہ منورہ میں مسجدِ نبوی (ص)پر بھی تھا۔