سپین کی حکومت نے سن 2020 کے دوران کورونا پابندیاں توڑنے والے شہریوں کو کئے گئے جرمانے واپس کرنے کا اعلان کر دیا ہے۔ علاقائی امور کی وزارت کا کہنا ہے کہ گزشتہ سال 11 لاکھ افراد کو 11 کروڑ 50 لاکھ یورو جرمانے کئے گئے تھے۔ ان افراد نے گھر پررہنے کے حکم کی خلاف ورزی کی تھی۔ حکومت نے ملک بھر میں مارچ کے وسط سے مئی کے آغاز تک گھر سے بغیر کسی انتہائی ضروری کام کے نکلنے پر پابندی عائد کر دی تھی۔ شہری صرف کام، ڈاکٹر سے ملنے، سودا سلف خریدنے اور اپنے علاقے میں کتے کو گھمانے کے لیے گھر سے نکل سکتے تھے۔

سپین کی آئینی عدالت نے جولائی میں ان پابندیوں کو انسانی حقوق کی خلاف ورزی قرار دیا تھا۔ ججوں کا کہنا تھا کہ حکومت نے یہ پابندیاں عائد کر کے سپین کے آئین کی خلاف ورزی کی ہے۔ انہوں نے لوگوں کو گلیوں اور سڑکوں پر روکنے کو بھی تنقید کا نشانہ بنایا تھا۔