ہالینڈ میں پناہ گزینوں کا سٹیٹس حاصل کرنے کے خواہشمند غیر ملکیوں کی تعداد میں ریکارڈ اضافہ دیکھنے میں آیا ہے۔

ہالینڈ کی امیگریشن اینڈ نیچر لائزیشن سروس کے اعدادو شمار کے مطابق رواں سال کی تیسری سہ ماہی میں ریکارڈ کیاگیا اضافہ سن 2015 میں پناہ گزینوں کا بحران شروع ہونے کے بعد سے سب سے بڑا اضافہ ہے۔ اس عرصے میں 8 ہزار 845 افراد نے پناہ کی درخواستیں جمع کروائیں۔ سب سے زیادہ شامی باشندوں نے 2 ہزار 550 درخواستیں جمع کروائیں جن کی تعداد دوسری سہ ماہی میں ایک ہزار پندرہ تھی۔ افغان پناہ گزینوں کی درخواستوں کی تعداد جو دوسری سہ ماہی میں صرف 210 تھی، تیسری سہ ماہی میں ایک ہزار 565 تک پہنچ گئی۔ ترکی سے آنے والے افراد کی درخواستوں میں بھی چار گنا اضافہ ریکارڈ کیا گیا۔

ہالینڈ میں پناہ کے خواہشمند افراد کو امیگریشن اینڈ نیچر لائزیشن سروس میں درخواست جمع کروانا ہوتی ہے جس کے بعد فیصلے سے پہلے درخواستگزار کے کئی انٹرویو کئے جاتے ہیں۔ درخواست مسترد ہونے کی صورت میں اپیل کا حق بھی دیا جاتا ہے۔