کورونا وائرس کی نئی قسم اومیکرون کے مریضوں کا علاج کرنے والی جنوبی افریقہ کی ایک ڈاکٹر کا کہنا ہے کہ ایسے مریضوں کی حالت تشویشناک نہیں ہوتی اور وہ جلد صحت یاب ہو جاتے ہیں۔

ساؤتھ افریقن میڈیکل ایسوسی ایشن کی چیئر اینجلک کوٹزی کا کہنا ہے کہ اومیکرون کے مریضوں کو پٹھوں میں درد اور تھکاوٹ کی شکایات ہوئیں جو دو سے تین روز میں ختم ہو گئیں۔ بعض مریضوں نے گلے میں خراش اور خشک کھانسی کی شکایت بھی کی جو عارضی تھی۔ انہوں نے مزید بتایا کے مریضوں میں سے کسی کو بھی آکسیجن لگانے کی ضرورت پیش نہیں آئی تاہم جس بچے کی حالت سب سے زیادہ خراب ہوئی اس کا بخار شدید ہو گیا لیکن وہ بھی دو دن میں ٹھیک ہو گیا۔