کوئی منہ میں سونے کا چمچ لے کر پیدا ہوتا ہے تو کسی کو دو سال بعد بھی یہ چمچ میسر آ سکتا ہے۔ ایسا ہی کچھ ہوا ہے دبئی ڈیوٹی فری ملینیم لاٹری کی تازہ ترین قرعہ اندازی میں جو بھارت کے ایک دو سالہ بچے نے جیت لی ہے۔دس لاکھ درہم کی لاٹری جیتنے والا دو سالہ کشان اپنے والدین کے ساتھ شارجہ میں رہتا ہے۔ اس کے والدین نے لاٹری کا یہ ٹکٹ 25 ستمبر کو ممبئی میں چھٹیاں گزار کر واپس آتے ہوئے دبئی ائر پورٹ پر خریدا تھا۔

کشان کے والد نے بتایا کہ وہ آن لائن ٹریڈنگ کا کام کرتے ہیں اور اس سے پہلے انہوں نے زندگی میں کبھی لاٹری کا ٹکٹ نہیں خریدا تھا۔ اس کی والدہ نے کہا کہ کورونا وائرس کی وجہ سے انہیں سخت مشکلات کا سامنا رہا ہے لیکن اب ان کا اور ان کے بیٹے کا مستقبل محفوظ ہےاس لیے وہ بہت خوش ہیں۔ سن 1999 میں یہ لاٹری شروع کی گئی تھی اور اب تک 184 بھارتی شہری یہ لاٹری جیت چکے ہیں۔