کینیڈا سے باہر سفر کرنے والے شہریوں کی سہولت کے لیے کینیڈا کی حکومت نے کورونا پاسپورٹ متعارف کروا دیا ہے۔

کورونا ویکسی نیشن مکمل کروانے والے شہری انٹرنیٹ سے پاسپورٹ خود ہی ڈاؤن لوڈ کر کے اپنے پاس رکھ سکیں گے۔ ویکسی نیشن مکمل کرانے والے شہریوں کو ان کے صوبوں اور علاقوں سے پہلے ہی پاسپورٹ مل چکے ہیں لیکن قومی سطح پر اب ایک جیسا ڈیجیٹل ڈاکومنٹ متعارف کروایا گیا ہے۔ اس نئے ڈاکومنٹ سے بارڈر پر تعینات اہلکاروں کو کورونا ویکسی نیشن کا پتہ چلانے میں زیادہ سہولت میسر آئے گی۔ کینیڈا سے جا کر واپس آنے والے مسافر اس ڈاکومنٹ کو ارائیو کین موبائل فون ایپ پر اپ لوڈ بھی کر سکیں گے۔ حکام کا کہنا ہے کہ اس سے متعلق مزید معلومات جلد ہی حکومت کینیڈا کی سرکاری ویب سائٹ پر جاری کر دی جائیں گی۔

یورپی یونین کئی ماہ پہلے ہی کورونا پاسپورٹ جاری کر چکی ہے جس کی مدد سے شہری ایک ملک سے دوسرے ملک بغیر قرنطینہ کئے سفر کر رہے ہیں۔ دوسری طرف امریکہ نے شہریوں کی پرائیویسی کو لے کرایسا کوئی بھی ڈاکومنٹ اختیار نہ کرنے کا فیصلہ کر رکھا ہے۔