کورونا کا نیا ویرئینٹ سامنے آنے کے بعد برطانیہ نے کئی ممالک پر سفری پابندیاں عائد کر دی ہیں۔ ان ممالک میں جنوبی افریقہ، نمیبیا، زمبابوے، بوٹسوانا، لیسوتھو اور اسواتینی شامل ہیں۔ امیکرون نامی نئی قسم نے سائنسدانوں اور حکومتوں کو شدید تشویش میں ڈال دیا ہے۔ نئی قسم کے آنے کے بعد کرونا کی ایک نئی لہر کا خدشہ ظاہر کیا جا رہا ہے۔

سائنسدان اسے کرونا کی سب سے خطرناک شکل قرار دے رہے ہیں۔ اب تک اس نئی قسم (B.1.1.529) کے درجنوں مصدقہ متاثرین سامنے آچکے ہیں۔ ان میں سے زیادہ تر جنوبی افریقہ کے صوبے گوٹنگ میں سامنے آئے لیکن چند کیسز بیرون ملک بھی موجود ہیں۔افریقی ملک بوٹسوانا میں چار کیسز سامنے آئے ہیں جب کہ ایک کیس ہانگ کانگ میں بھی دریافت ہوا ہے جس کے بارے میں کہا جا رہا ہے کہ یہ مریض جنوبی افریقہ سے سفر کر رہا تھا۔