دنیا کے محتلف ممالک کے لیے ویزہ سروس کرنے والی فرم وی ایس ایف گلوبل نے متحدہ عرب امارات کے دارالحکومت ابوظہبی اور دبئی میں نئے اوقات کار کا اعلان کر دیا ہے۔ نئے شیڈول کے مطابق وی ایس ایف گلوبل کے دفاتر پیر سے جمعرات صبح نو بجے سے شام پانچ بجے تک کھلیں گے جبکہ جمعہ کے روز بھی یہی وقت ہوگا لیکن دوپہر ایک بجے سے ڈھائی بجے تک نماز جمعہ کا وقفہ ہوا کرے گا۔ ہفتہ اور اتوار کو وی ایس ایف گلوبل کے تمام دفاتر بند رہیں گے جبکہ اس کی فون ہیلپ لائن بھی نئے اوقات کے مطابق کام کرے گی۔ سال کے آغاز میں متحدہ عرب امارات نے پبلک سیکٹر میں ہفتے اور اتوار کی چھٹی لاگو کی تھی جبکہ جمعہ کو نصف دن کام کے لیے مقرر کیا گیا تھا۔ پرائیویٹ سیکٹر کی زیادہ تر کمپنیوں نے بھی ہفتے اتوار کی چھٹی شروع کر دی ہے۔

ابو ظہبی اور دبئی میں فلپائن ای پاسپورٹ کے تجدیدی مراکز ہفتے میں ساتوں روز کام جاری رکھیں گے۔ ان کے اوقات کار صبح آٹھ سے رات آٹھ بجے تک ہوں گے۔ متحدہ عرب امارات میں رہائش پذیر فلپائن کے ایسے شہری جن کے پاس ای پاسپورٹ ہیں وہ ان مراکز پر  جانے سے پہلے بکنگ کروا کر پاسپورٹ کی تجدید کروا سکتے ہیں۔